ភ្នំពេញ៖ ប្រធានអាស៊ានឆ្នាំ២០២២ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានឯកភាពលើការស្នើសុំរបស់រដ្ឋមន្ត្រីការបរទេសលោកឧបនាយករដ្ឋមន្ត្រី ប្រាក់ សុខុន ដែលបានសម្របសម្រួលជាមួយប្រទេសឥណ្ឌូនេស៊ី និងថៃ ដើម្បីរៀបចំកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធនឹងប្រព្រឹត្តិទៅក្នុងពេលតែមួយ ពីថ្ងៃទី១០ រហូតដល់ថ្ងៃទី១៣ ខែវិច្ឆិកា ឆ្នាំ២០២២ នៅរាជធានីភ្នំពេញ។

ក្នុងលិខិតគោរពជូនសម្ដេចតេជោ ចុះថ្ងៃទី១ ខែកុម្ភៈ ឆ្នាំ២០២២ ដែលត្រូវបានសម្ដេចតេជោ ចារឯកភាពនៅថ្ងៃទី២៦ ខែកុម្ភៈ លោកឧបនាយករដ្ឋមន្ត្រី ប្រាក់ សុខុន បានបញ្ជាក់ថា ការកំណត់ប្រជុំកំពូលអាស៊ានពីថ្ងៃទី១០ រហូតដល់ថ្ងៃទី១៣ ខែវិច្ឆិកានេះ ក៏ទទួលបានការឯកភាពពីប្រទេសសមាជិកអាស៊ានទាំងអស់ផងដែរ។

បន្តពីកិច្ចប្រជុំកំពូលអាស៊ានក៏នឹងមានកិច្ចប្រជុំកំពូល G20 ដែលគ្រោងនឹងរៀបចំពីថ្ងៃទី១៥-១៦ ខែវិច្ឆិកា ឆ្នាំ២០២២ នៅប្រទេស ឥណ្ឌូណេស៊ី និងកិច្ចប្រជុំ APEC គ្រោងនឹងរៀបចំពីថ្ងៃទី១៨-១៩ ខែវិច្ឆិកា ឆ្នាំ២០២២ នៅប្រទេសថៃផងដែរ។

គួរបញ្ជាក់ថាកម្ពុជាបានក្លាយជាប្រធានអាស៊ានប្ដូរវេនកាលពីថ្ងៃទី១ ខែមករា ឆ្នាំ២០២២ បន្តការងារពីប្រទេសព្រុយណេ ដែលធ្វើឱ្យនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ក្លាយជាអ្នកដែលបានកាន់ញញួរប្រធានអាស៊ានរហូតដល់៣ដង៕